थँक यू नूतन ताई

खरंतर थँक यू परक्यांना म्हणतात पण असे काही लोक आपल्या आयुष्यात येतात त्यांना आपण समोर कधीच थँक्स म्हणत नाही पण मनात खूप असते त्यांच्या विषयी. अशीच एक व्यक्ती म्हणजे माझी ताई " नूतन ताई" "नूतन चित्रे" आताची नूतन कामथ.

​

. आमच्या शेजारी राहायची. मी अगदी लहान होते तेव्हा पासून मला नेहमी तिच्या सारखे व्हायाचे होते. तिचे बोलणे राहणे सगळेच मला आवडायचे. मी कॉलेज ला असताना ती कॉलेज ला प्रोफेसर होती. मराठी मध्यम मधून शिकून पण तिचे इंग्रजी फार अस्सखलित होते. मी कॉलेज ला असताना ती मला इंग्रजी शिकवायची. स्टारडस्ट , फिल्मफेअर सारखी मासिक किंवा टाइम्स ऑफ इंडिया मधला एखादा परिच्छेद वाचायला द्यायची आणि मग त्याचा अर्थ सांगायला सांगायची. आणि मी कुठलीही लबाडी करू नये म्हणून तिच्या सामोरं  बसायला लावायची. नुसता अर्थच नाही विचारायची तर एखाद्या शब्दाचा अर्थ हि विचारायची. आणि माझे जे काही चुकले असेल ते नीट समजावून सांगायची. बरेचसे शब्द त्या वेळी डोक्यावरून जायचे पण ती नीट समजावून त्याचा अर्थ सांगायची. जवळ जवळ एक वर्ष भर तिने हे करून घेतले होते माझ्या काढून. आता माझे जे काही बरे इंग्लिश आहे ते तिच्यामुळेच. माझ्या मध्ये जो काही आत्मविश्वास आहे तो बराचसा तिच्या मुळेच आहे. सगळ्या चांगल्या गोष्टीचे कौतुक करून, जिथे रागवायचे तिथे ती नेहमी रागावची. मी बऱ्याच गोष्टी तिच्याकडून शिकले. कुणालाही कमी न लेखणे, आपल्याला जमेल तितकी दुसऱ्याची मदत करणे. आणि आपल्या पेक्षा लहानांना मोठ्या बहिणीच्या मायेने सांभाळणे. आता जरी आमची भेट होत नसती तरी फोन , वॉट्सअँप वर ती मला आधार देत असते. थँक यू ताई मला एक चांगली व्यक्ती बनविण्यासाठी. आणि आत्मविश्वासाने काहीतरी करण्याची जिद्द देण्यासाठी.

​ ​

 लव्ह यू ताई.